Monday, July 20, 2015

თარგმანი: დანილ ხარმსი - უსათაურო II
















საკვირველი რამე გადამხდა: უცებ დამავიწყდა, ჯერ რომელი მოდის - 7 თუ 8.
გავეშურე მეზობლებთან და ვკითხე თუ რას ფიქრობდნენ ამასთან დაკავშირებით.
წარმოიდგინეთ ჩემი და მათი გაკვირვება, როდესაც აღმოვაჩინეთ რომ ისინიც ვერ იხსენებენ თვლის მიმდევრობას. 1, 2, 3, 4, 5 და 6 ახსოვთ, შემდეგ კი დაავიწყდათ.
ჩვენ ყველანი წავედით კომერციულ მაღაზია "გასტრონომში", ზნამენსკისა და ბასეინის ქუჩების კუთხეში რომ არის და ვკითხეთ მოლარეს ჩვენი გაუგებრობის შესახებ. მოლარემ სევდიანად გაიღიმა, პირიდან პატარა ჩაქუჩი გამოიღო და ოდნავ შეჭმუხნული ცხვირით გვითხრა:
- ჩემის აზრით, შვიდი მოდის რვის შემდეგ იმ შემთხვევაში, თუ რვა მოდის შვიდის შემდეგ.
ჩვენ მადლობა გადავუხადეთ მოლარეს და გახარებულები გამოვცვივდით მაღაზიიდან. მაგრამ აქ მოლარის სიტყვებს ჩავუფიქრდით და ისევ დავნაღლიანდით, რადგან ისინი ყოველგვარ აზრს მოკლებულად მოგვეჩვენა.
რა უნდა გვექნა? წავედით პარკში და დავიწყეთ ხეების დათვლა. მაგრამ ექვსამდე რომ მივედით, გავჩერდით და დავიწყეთ კამათი: ერთნი ფიქრობდნენ რომ შემდეგ მოდის 7, სხვების აზრით კი 8.
ალბათ ძალიან დიდხანს ვიკამათებდით, მაგრამ საბედნიეროდ, იქვე სკამიდან გადმოვარდა ვიღაცა ბავშვი და ორივე ყბა მოიტეხა. ამან ყურადღება გადაგვატანინა ჩვენი კამათიდან.
შემდეგ კი სახლებში დავიშალეთ.

დანილ ხარმსი


No comments:

Post a Comment